Silfra

TS19

Silfra

Silfra er nýjasti bíll Team Spark. Bíllinn er í stórum dráttum mjög svipaður fyrri bíl í hönnun en ýmis kerfi hafa verið fínpússuð og betrumbætt. Burðarvirkið, sem er úr koltrefjum, var létt um 30% og nýjar aðferðir notaðar við framleiðslu. Rafkerfi bílsins var gert áreiðanlegra og skynjarakerfi stækkað til að geta greint vandamál og flöskuhálsa betur. Nýtt fjarskiptakerfi gerir liðsmönnum kleift að fylgjast með öllum kerfum bílsins yfir netið í rauntíma. Þar með má fylgjast með afköstum, stöðu rafhlaða og ýmsu fleiru, og láta ökumenn vita ef þess þarf.

Keppnir

Smíði Silfru lauk í maí 2019 og því gafst góður tími til að prófa bílinn hérlendis fyrir keppnir. Sumarið 2019 var keppt með Silfru á þremur keppnum í Evrópu. Fyrst var keppt á Autodromo Varano á Norður-Ítalíu, þar gengu prófanir vel og fékk bíllinn að keyra í öllum akstursgreinum, þó síðustu greininni hafi verið sleppt vegna tímaþröngs. Eftir það var bílnum pakkað í flýti í flutningabíl og fluttur til Red Bull Ring í Austurríki, sem er ein fullkomnasta Formúlu 1 braut heims. Dómarar þar eru töluvert strangari og settu athugasemdir við eitt og annað. Liðsmenn þurftu að hafa hraðar hendur og tókst að laga öll atriðin á einum degi. Bíllinn keyrði 8 hringi í langkeyrslu (e. endurance) en þurfti að hætta vegna villu í rafhlöðupakka.

Upplýsingar

  • 100 kW (130 hö.) Emrax 225 rafmótor

  • 6,2 kWh rafhlöður með 600 V spennu (144 LiPo sellur)

  • A-arma fjöðrunarkerfi með Z-flex veltihemli

  • Keðjudrif með LSD mismunadrif

  • Þyngd 232 kg

  • Hámarkshraði 136 km/klst